افغانستان نیوز۲۴ : د پاکستان د خیبر پښتونخوا په کوهاټ ولسوالۍ کې د زاړه پولیسو مرکز اړوند جومات کې د جمعې د لمانځه پر مهال زوروره چاودنه شوې، چې له امله یې لږ تر لږه ۱۶ کسان وژل شوي او له ۵۰ ډېر نور ټپیان شوي دي.
د خیبر پښتونخوا د پولیسو د مشر ذوالفقار حمید په وینا، د لومړنیو مالوماتو له مخې، له چاودېدونکو توکو ډک موټر د زاړه پولیسو مرکز دروازې ته ورغورځول شوی او له ټکر وروسته چاودنه شوې ده. له چاودنې وروسته د ډزو غږونه هم اورېدل شوي دي.
د چارواکو په وینا، په وژل شویو کې پنځه پولیس او ۱۱ ملکي وګړي شامل دي. د کوهاټ د مرکزي روغتون د چارواکو په وینا، روغتون ته ۱۵ مړي او له ۵۰ ډېر ټپیان انتقال شوي دي. د ټپیانو ډېری کسان لمونځ کوونکي بلل شوي دي.
د چاودنې له امله د جومات بهرنۍ برخه زیانمنه شوې، د ودانۍ یوه دېوال نړېدلی او د جومات مخې ته ژوره کنده هم رامنځته شوې ده. د ژغورنې ډلې د پېښې سیمې ته رسېدلې او د ژغورنې عملیات یې ترسره کړي دي.
د پېښې له امله د کوهاټ–هنګو لویه لار د تګ راتګ پر مخ تړل شوې او د پولیسو اضافي ځواکونه سیمې ته استول شوي دي. په کوهاټ مرکزي روغتون کې هم د ټپیانو د زیات شمېر له امله بېړنی حالت اعلان شوی دی.
د پاکستاني چارواکو په وینا، په سیمه کې د امنیتي عملیاتو پر مهال یو وسلهوال هم وژل شوی دی. تر اوسه کومې ډلې د پېښې مسؤلیت نه دی منلی او د پېښې په اړه د امنیتي ادارو څېړنې روانې دي.
یادونه: د پېښې د مرګژوبلې شمېرې لا هم د بدلون وړ دي، ځکه د ژغورنې او درملنې عملیات روان دي.
