افغانستان نيوز۲۴: د پاکستان جمعیت علماء اسلام ګوند مشر مولانا فضل الرحمن د خیبرپښتونخوا، بلوچستان او نورو سیمو روانو ناامنیو ته په اشارې ويلي چې پاکستان پخپله د دې ناامنیو تخم کرلی دی.
هغه زیاته کړې، له طالبانو سره د پاکستان اړیکې په خرابېدو دي، ځکه په پاکستان کې د ناامنۍ تور پر افغانستان پورې کوي چې جنګیالي ترې ورځي.
فضل الرحمن زياته کړې چې ښايي له افغانستانه د ورتلونکو جنګیالیو شمېر لږ وي او د طالبانو له کنتروله هم بهر وي، خو پاکستانۍ رسنۍ هغه راپورونه خپروي چې حکومت یې ورته ورکوي.
هغه زیاتوي چې د جنرال ضیاالحق له دورې راهیسې د افغانستان د دولتونو پر ضد پاکستان کې جنګیالي روزل کېدل.
د چارو پوهان وایي چې د مولانا فضل الرحمن کورنۍ او ګوند هم مشروع افغان دولتونو پر ضد د اسلامکارو جنګیالو ډلو په روزنه، ملاتړ او هغوی ته په تبلیغ کولو کې لویه ونډه لرلې ده.
د پاکستان لومړي وزیر شهباز شریف څو ورځې وړاندې وویل چې طالبان دې د پاکستان پر ضد د افغان خاورې کارېدل منع کړي.
پاکستاني چارواکي ادعا کوي چې له افغانستانه د تحریک طالبان پاکستان جنګیالي ورځي او هلته بریدونه کوي؛ خو طالبان وایي وایي پاکستان کې روانه ناامني د هغه هیواد کورنۍ موضوع ده.
