افغانستان نيوز۲۴: حامد کرزی، رئیس‌جمهور پیشین افغانستان، نگرانی خود را نسبت به اخراج اجباری مهاجرین افغان از پاکستان و برخورد نادرست با آنان ابراز داشته است.
وی گفته است که گزارش‌ها نشان می‌دهند، مهاجرین نه‌تنها مورد بی‌احترامی قرار می‌گیرند، بلکه دارایی‌های‌شان نیز از آنان گرفته می‌شود.
آقای کرزی از حکومت پاکستان خواسته است تا بر بنیاد قوانین مهاجرین، حقوق بشر و موازین بین‌المللی با مهاجرین افغان برخورد انسانی داشته باشد.
او همچنان از نهادهای بین‌المللی کمک‌رسان، سرمایه‌گذاران و تاجران ملی خواسته است تا از افغان‌های بازگشته به کشور، حمایت همه‌جانبه نمایند.
رئیس‌جمهور پیشین ابراز امیدواری کرده است که عوامل اصلی مهاجرت در افغانستان، به‌ویژه ممنوعیت آموزش دختران در لیسه‌ها و دانشگاه‌ها، از میان برداشته شود، تا هیچ‌کس مجبور به ترک وطن نشود و مهاجرین بتوانند با رضایت و آرامش به کشور بازگردند.
