افغانستان نيوز۲۴: د مخابراتو او معلوماتي ټکنالوجۍ وزارت وزیر د ولایتي سفرونو په لړ کې پکتیکا ولایت ته سفر کړی.
د مخابراتو او معلوماتي ټکنالوجۍ وزارت وزیر نجیب الله حیات حقاني د ولایتي سفرونو په دوام د هېواد جنوب ختیځ ولایت پکتیکا ته د مخابراتي خدمتونو د ارزونې په موخه سفر کړی.
نجیب الله حیات حقاني د هېواد شمال شرق ولایتونو ته له سفر وروسته پکتیکا ولایت ته تللی او هلته یې د یاد ولایت له مرستیال والي مخدوم عبدالسلام سعادت، ځايي چارواکو، علماء کرامو او د سیمې له اوسېدونکو سره د مخابراتي خدمتونو د ارزونې، د ټي ډي ایف د لسمې پروژې د تطبیق او همدا راز د مخابراتي او انټرنټي ستونزو د حل په تړاو خبرې کړي.
ياد وزیر دغو لیدنو کې اړونده مسؤلینو او ځايي اوسېدونکو ته ډاډ ورکړی چې د مخابراتو او معلوماتي ټکنالوجۍ وزارت د هېواد لرو پرتو سیمو ته ځانګړې پاملرنه کړې او هڅه کوي د هېواد ټولې برخې له مخابراتي خدمتونو برخمنې کړي.
د مخابراتو او معلوماتي ټکنالوجۍ وزات وزیر د پکتیکا ولایت د مرستیال والي مخدوم عبدالسلام سعادت او ګڼو نورو ځايي چارواکو سره د لیدنې په ترڅ کې د دوی له لوري د یو لړ سیمو چې لا هم له مخابراتي خدمتونو بې برخې دي د ۴۴ نويو مخابراتي انټنونو منظوري ورکړه، چې جوړېدو سره به یې د پکتیکا ولایت ډیری لرې پرتې سیمې له مخابراتي خدمتونو برخمنې شي.
د یادونې وړ ده د مخابراتو او معلوماتي ټکنالوجۍ وزارت تر دې وړاندې د یاد ولایت لرو پرتو سیمو لپاره ۲۹ نور مخابراتي انټنونه د ټي ډي ایف لسمې پروژه کې هم منظور کړي وو چې له دې سره به د ټولو هغو مخابراتي انټنونو شمېر چې پکتیکا ولایت کې جوړېږي ۷۳ مخابراتي سایټونو ته ورسېږي.
