افغانستان نیوز۲۴: د افغانستان اسلامي جمهوریت پخوانی ولسمشر د پښتو ژبي د ولسي شاعر مطیع الله تراب پر مړینې خواشینې څرګنده کړې او ویلي دي چې د هغه د ژوند پیغام تل پاتې دی.
محمد اشرف غني نن چهارشنبه د جولای په ۱۶ مه نېټه په خپله اېکس پاڼه کې د یو پیغام په خپرولو سره زیاته کړې چې ولسي شاعرانو له ډېرې مودې راهیسې د افغانانو د احساساتو، ستونزو، هیلو او خیالونو استازیتوب کړی دی.
د هېواد پخواني ولسمشر همدا ډول څرګنده کړې چې خدای بښلي تراب د ولسي شاعرانو دغه لړۍ ژوندۍ ساتلې وه، غږ یې وچت، ژبه یې سوچه، دردونه یې ژور او هیلې یې د باعزته ژوند لپاره روښانه و.
نوموړي په لر او بر کې د خدای بښلي تراب ملګرو، خواخوږو، هېوادوالو او د هغه کورنۍ ته د تسلیت مراتب وړاندې کړي دي.
دا په داسې حال کې ده چې د پښتو ژبې دغه نوموتی او منل شوی ولسي شاعر دوه ورځې وړاندې د زړه د ناروغۍ له کبله په حق ورسید او تېره ورڅ په ننګرهار ولایت کې خاورو ته وسپارل شو.
