افغانستان نیوز۲۴: د ننګرهار وادې کرنیز شرکت د پالونیا ونو د قلمو د روزنې په برخه کې خپله وروستۍ تجربوي پروژه بریالۍ ارزولې ده، او دا شرکت په پام کې لري چې دغه هڅې نوري هم پراخې کړي.
د شرکت د معلوماتو له مخې، دا نوې تجربه د هډې فارم د ثمرخېلو قوریې په یوه برخه کې عملي شوې، چیرته چې له ریښو اخیستل شوې قلمې د آزمایښتي ډول په توګه په شپاړس پلاستيکي کڅوړو کې کرل شوې وې. د کرنې له لومړنیو پایلو ښکاري چې دا هڅه مثبته نتیجه ورکړې ده.
پالونیا یوه له هغو ونو څخه ده چې په چټکه وده، اقلیمي برابرښت، د خاورې په تقویه، زرغونتیا، او اقتصادي ارزښت کې ځانګړی اهمیت لري. کارپوهان باور لري چې دا بوټي د چاپېریال د ساتنې او دوامداره کرنیز پرمختګ لپاره اغېزمن رول لري.
چارواکي وایي، د یادې ونې د لا زیات تولید او ترویج لپاره به علمي څېړنې او کرنیزې هڅې ګړندۍ شي، ترڅو دا تجربه په نورو سیمو کې هم تطبیق او پراخه شي.
