افغانستان نیوز۲۴: د پښتون ژغورنې غورځنګ مشر، منظور پشتین، ویلي چې په پاکستان کې پښتانه د غلامۍ په شرایطو کې ژوند کوي، خو د دې سره سره، د اګست په ۱۴مه چې د پاکستان د خپلواکۍ ورځ ګڼل کېږي پر پښتنو په زور د پاکستان بیرغ تحميلېږي او د ازادۍ تر نامه لاندې غلامي ورباندې لمانځل کېږي.
نوموړي په یوه پیغام کې څرګنده کړې: «څو ورځې وروسته به بیا هم دغه پاکستان پښتنو ته ووايي، چې جنډې واخلئ او خپله غلامي د آزادۍ په نامه ولمانځئ. او په زور به یې په موټرسايکلونو او ګاډو پاکستاني بیرغونه ورښخوي.»
پشتین ویلي، دا کړنه د پښتنو ملي حیثیت ته سپکاوی دی او د هغوی د هویت پر وړاندې یوه تحمیلي تګلاره ده.
نوموړي له خلکو غوښتي چې د ملي ارزښتونو، فرهنګي خپلواکۍ او هویتي دفاع لپاره راپورته شي او د داسې جبري سمبولونو پر وړاندې خپل دریځ څرګند کړي.
