افغانستان نيوز۲۴: بلوچستان په نوم یوې بېلتونپالې ډلې، چې ځان د “بلوچستان جمهوریت” بولي، په یوه تازه اعلامیه کې د پاکستان پر پوځ او امنیتي پالیسو سختې نیوکې کړې دي.
په اعلامیه کې دغه ډلې ادعا کړې چې پاکستان د سیمې د بېثباتۍ اصلي لامل دی او تور یې پورې کړی چې اسلاماباد له کلونو راهیسې د خپلو ستراتیژیکو موخو لپاره له وسله والو ډلو ملاتړ کوي.
اعلامیه کې همداراز ویل شوي چې بلوچستان نور د پاکستان تر بشپړ کنټرول لاندې نه دی او د دوی په وینا، د خپلواکو پوځي او اداري جوړښتونو د رامنځته کولو هڅې روانې دي.
یادې ډلې له نړیوالې ټولنې، هند او افغانستان څخه غوښتي چې د دوی دریځ ته پاملرنه وکړي او د پاکستان پر وړاندې عملي ګامونه واخلي.
تر اوسه د پاکستان حکومت او پوځ د دې اعلامیې په اړه کوم رسمي غبرګون نه دی ښودلی. بلوچ بېلتونپالې ډلې له تېرو څو کلونو راهیسې د پاکستان له مرکزي حکومت سره په شخړه کې دي او وخت ناوخت ورته سیاسي او پوځي دریځونه خپروي
