افغانستان نيوز۲۴: د ټېکنالوژۍ او فضايي صنعت مخکښ سوداګر، ایلن ماسک، د نړۍ لومړی کس ګرځېدلی چې شتمني یې له یو ټریلیون ډالرو اوښتې ده.
د نړیوالو رسنیو د راپورونو له مخې، د «سپېس اېکس» شرکت د ونډو له عامه پلور او د سهمونو د ارزښت له چټک لوړوالي وروسته د ماسک ټوله شتمني شاوخوا ۱.۱ ټریلیون ډالرو ته رسېدلې ده.
راپورونه ښيي چې د سپېس اېکس ونډې د بازار په لومړۍ ورځ د پام وړ لوړې شوې، چې له امله یې د ماسک شخصي شتمني په لسګونو میلیارده ډالره زیاته شوه او هغه یې د نړۍ د لومړي ټریلیونر په توګه ثبت کړ.
ماسک چې د «ټېسلا»، «سپېس اېکس»، «نیورالېنک» او نورو سترو شرکتونو بنسټاېښودونکی او لوی ونډهوال دی، له دې وړاندې هم د نړۍ تر ټولو شتمن کس بلل کېده، خو د سپېس اېکس وروستي پرمختګونه او د دغه شرکت بېساری ارزښت د هغه شتمني نوي تاریخي پړاو ته ورسوله.
اقتصادي شنونکي باور لري چې د سپېس اېکس د ارزښت لوړېدل او د مصنوعي ځیرکتیا په برخه کې د ماسک پراخې پانګونې د هغه د شتمنۍ د چټک زیاتوالي مهم عوامل دي.
