افغانستان نيوز۲۴: د خیبر پښتونخوا د خیبر ولسوالۍ په لنډي کوتل تحصیل کې د کم شلمان پر سړک د اړخنده په نوم یوه پولیسه پوسته د بارودي چاودنې له امله ویجاړه شوې ده.
د سیمهییزو سرچینو د معلوماتو له مخې، پېښه تېره شپه رامنځته شوې، کله چې د حیدري چیک پوستې څخه شاوخوا درې کیلومتره لرې د کم شلمان په لوري د اړخنده پوستې دننه زوروره چاودنه وشوه.
د چاودنې غږ تر لرې سیمو پورې اورېدل شوی او د سیمې اوسېدونکو ترمنځ یې وېره او اندېښنه خپره کړې ده.
سرچینې وایي، یاده پوسته له نږدې څلورو کلونو راهیسې غیر فعاله او تړلې پرته وه. تر اوسه د پېښې له امله د احتمالي مرګژوبلې په اړه څه نه دي ویل شوي.
پولیسو د پېښې د څرنګوالي او د مسئولینو د پېژندلو لپاره څېړنې پیل کړې دي، خو تر اوسه یې د چاودنې د عاملینو په اړه رسمي مالومات نه دي خپاره کړي.
