افغانستان نيوز۲۴: د پښتون خوا ملي عوامي ګوند مشر او د پاکستان ولسمشرۍ ته ولاړ کانديد محمود خان اڅکزي په خپل وروستي خبري کانفرنس کې ويلي: په پنجاب او سند ولایتونو کې له افغان اتباعو سره روان غیر انساني، توهین او سپکاوی ډک چلند د زغملو وړ نه دی.
هغه يادونه کړې چې دا هغه افغانان دي چې تاسې خپله دلته راوستل، د اسلام د مجاهدینو لقب مو ورکړ، او حتی د لومړي وزير په دفتر کې مو هره اونۍ د ګلبدین حکمتیار په ګډون ځانګړي ترتیبات ورته نیول.
نن که د دوی د جایدادونو غصب او د پانګونو په اړه ناسمه طمعه لری، نو دا دې هم در یاد وي چې دغو افغانانو دلته میلیاردونه روپۍ پانګونه کړې.
دا خلک یواځې کډوال نه، بلکې د اقتصاد برخهوال دي.
د دې لکونو افغانانو د برخلیک په تړاو دې د پاکستان حکومت، UNHCR او د افغانستان اسلامي حکومت ګډې ناستې وکړي، او یوه عادلانه، انساني حل لاره دې ورته پیدا کړي.
اڅکزي د خپلو خبرو په دوام زياته کړې، افغان ولس هغه ملت دی چې نه ناورین هېروي، نه احسان. که عزت ورته ولري شي، وفاداري يې د تاریخ برخه کېږي، او که سپکاوی وشي، نو چوپ نه پاتې کېږي.
هغه د خپلو خبرو په پای کې يادونه کړې چې نوموړی دا ناروا چلند په کلکه غندي. او زیاتوي چې یاد ظلم او ناروا څخه به نړیوالې محکمې ته شکایت وشي.
