افغانستان نيوز۲۴: د افغانستان الف کرکټ لوبډلې د درې اړخيزې پنځوس اوره لوبلړۍ په خپله دويمه لوبه کې ايرلېنډ الف لوبډلې ته د اوو وېکټو په توپير ماته ورکړه.
دغه سيالي نن «پنجشنبه،وري۲۸مه» د متحده عربي اماراتو په زيد کرېکټ لوبغالي کې وشوه.دې لوبه کې ايرلېنډ د ټولو لوبغاړو په سوځېدو د ۲۰۴ منډو هدف ټاکلی وو چې افغان ابداليانو د درېيو لوبغاړو په سوځېدو لاسته راوړ.
افغان لوبډلې ته په توپوهنه کې ډېرې منډې زبيد اکبري ۷۶ او توپاچونه کې قيس احمد درې وېکټې ترلاسه کړې چې پرمټ يې د لوبې غوره لوبغاړی وټاکل شو.
ابداليانو دې لوبلړۍ کې خپله لومړی لوبه سريلانکا ته بايللې وه.
د افغان لوبډلې راتلونکې سيالي بيا يو ځل بيا له ايرلېنډ سره وي او وروسته به بيا له سریلانکا سره لوبه کوي.
د ويلو ده چې دغه درې اړخيزه لوبلړۍ د افغانستان په کوربهتوب د ابداليانو، ايرلينډ الف او سريلانکا الف لوبډلو ترمنځ متحده عربي اماراتو کې روانه ده.
