افغانستان نيوز۲۴: په خوست ولایت کې د اسیا په کچه د یو ستر ورزشي کمپلېکس جوړول رسمي پیل شول.
دغه کمپلېکس به د فوټبال، والیبال، ټینس میدانونه، اداري ودانۍ، جیم، اشپزخانه او ښوونځی ولري.
د نجيب تلاش خیریه بنسټ به دا پروژه په څوارلسو میاشتو کې د څلورو میلیونو ډالرو په لګښت جوړ کړي.
د خوست مرستیال والي مولوي محبوب شاه قانت وویل، اسلامي امارت په تېرو څلور کلونو کې په ولایت کې سترې اقتصادي او ورزشي پروژې پلې کړې دي او امنیت ټینګ دی.
د فوټبال فدراسیون رئیس یوسف کارګر وویل، نوی کمپلېکس به د نړیوالو معیارونو سره سم وي او د اسیا په کچه به د نړیوالو سیالیو کوربه وي.
د بدني روزنې او المپیک رئیس احمدالله واثق وویل، شاوخوا ۱۳ لکه ځوانان په هېواد کې ورزش کوي او له نړیوالو ادارو یې د ورزش د پراختیا لپاره ملاتړ وغوښت.
خوست د ورزش کور ګڼل کېږي او اوس مهال په ولایت کې ۵۰ زره رسمي لوبغاړي او ۶۰ ورزشکاران په ملي ټیمونو کې شامل دي.
