افغانستان نیوز۲۴: د افغانستان لپاره د امریکا پخواني ځانګړي استازي زلمي خلیلزاد ویلي، د پاکستان د لومړي وزیر شهباز شریف څرګندونې د افغان ښځو د حقونو په اړه له هغه څه سره توپیر لري چې نوموړی یې د پاکستان د تېرو تګلارو په اړه یادونه کوي.
خلیلزاد ویلي، شهباز شریف د ملګرو ملتونو د عمومي اسامبلې په وینا کې د افغان ښځو د حقونو ملاتړ کړی، خو د پاکستان د تېرو ۳۰ کلونو سیاستونه د هغه د ژمنتیا په اړه شکونه راولاړوي.
د نوموړي په وینا، د پاکستان په دغو تګلارو کې د امریکايي ځواکونو پر وړاندې د وسلهوالو ډلو ملاتړ او له افغان کډوالو سره ناسم چلند شامل دي.
په همدې حال کې، په پاکستان کې د افغان کډوالو او محصلینو پر وضعیت هم اندېښنې مطرح شوې دي.
پاکستاني چارواکو په بېلابېلو پړاوونو کې له خپلو پوهنتونونو څخه د یو شمېر افغان محصلینو د وتلو غوښتنه کړې، چې په دغو محصلینو کې افغان نجونې هم شاملې دي.
خلیلزاد ټینګار کړی چې افغانستان او پاکستان دواړه اړتیا لري له یو بل سره ډېرې ښې او باثباته اړیکې ولري او د دواړو هېوادونو ترمنځ د اړیکو د بیا سمون لپاره د یوه نوي پړاو غوښتنه یې کړې ده.
نوموړي ویلي: «دواړه هېوادونه اړتیا لري او باید ډېرې ښې اړیکې ولري. د اړیکو بیا سمون اړین دی.»
