افغانستان نيوز۲۴: د افغانستان د اسلامي امارت ویاند ذبیح الله مجاهد وایي، د تېرې شپې پر مهال پاکستاني پوځ یو ځل بیا د افغانستان هوايي حریم نقض کړی او د کونړ، خوست او پکتیکا ولایتونو په ځینو سیمو کې یې د ملکي وګړو کورونه بمبار کړي دي.
مجاهد په خپره کړې اعلامیه کې ویلي، د دغو بریدونو له امله ۱۱ ماشومان، یوه ښځه او یو سپینږیری ژوند له لاسه ورکړی، او ۱۴ نورې ښځې او ماشومان ټپیان شوي دي.
نوموړي دغه بریدونه د بشري حقونو او نړیوالو اصولو خلاف عمل بللی او ویلي یې دي چې د ملکي وګړو په نښه کول د توجیه وړ نه دي. هغه دا پېښه «بشري جنایت» او د افغانستان پر وړاندې د تېري یو اقدام یاد کړی دی.
تر دې دمه د پاکستان لوري د دغو څرګندونو په تړاو رسمي دریځ نه دی خپور کړی، او د تلفاتو شمېر هم د خپلواکو سرچینو له خوا په جلا توګه نه دی تایید شوی.
