افغانستان نيوز۲۴: لندن – د افغان کډوالو ښځينه کرکټ ملي لوبډلې غړو د بریتانیا له پاچا چارلس درېم سره په ځانګړې رسمي غونډه کې ليدنه کړې ده.
دا ليدنه د چارشنبې په ورځ د لندن په کلارنس هاوس ماڼۍ کې ترسره شوه، چې پکې پاچا د لوبډلې د غړو د ژوند، د افغانستان څخه د وتلو کیسې او د کرکټ د دوام په اړه خبرې واورېدې.
د راپورونو له مخې، دا لوبډله هغه افغان ښځينه لوبغاړې دي چې د ۲۰۲۱ کال وروسته له افغانستانه وتلي او اوس د “افغان کډوالو ښځينه کرکټ لوبډلې” په نوم په جلاوطنۍ کې لوبې کوي، ځکه په افغانستان کې د ښځو پر سپورټ بندیزونه لګېدلي دي.
لوبغاړو پاچا ته وویل چې دوی د سختو شرایطو، خطرناکو سفرونو او ګڼو ستونزو له لارې وتلي، خو بیا هم یې د کرکټ مینه او هدف ژوندی ساتلی دی.
پاچا چارلس درېیم د دوی د زغم او هڅو ستاینه وکړه او د سپورټ او زده کړو په برخه کې یې د هغوی د هڅونې ملاتړ څرګند کړ.
دغه لیدنه د نړیوال کرکټ د روانو سیالیو او د افغان ښځو د سپورټ پر وضعیت د نړیوالو پام د زیاتېدو په ترڅ کې ترسره شوې ده، چې د بشري حقونو او د ښځو د سپورټ د ملاتړ په اړه پراخ بحثونه هم راپورته کړي دي.
